Peb 21, 2005

Pwede bang umiyak na lang at hindi na magkwento? Ibinenta ko na ang kaluluwa ko hindi sa Domini kundi sa Diaboli para palagi na lang tinta o laway ang maaari kong iluha.

Pero ayoko ng tanong.

Ayoko rin ng running commentary. Ano, bibilangin ang luha, o ibibigay ang velocity paglampas nito sa baba? O sasabihin, iyong isa mo, medyo malapot-lapot, ano bang asin ang gamit mo run? Iodized? O caramelized tulad ng dilis sa Komeshi?

Ayoko ng nagpapatahan. Putsa, gusto ko ba ng nagpapaiyak sa panahon ng pagtahan? Ano'ng gagawin ko sa pagpapatahan sa panahon ng mga patak? Gusto ko lang umiyak. Kahit parang kuliglig na humuhuni sa lamig ng gabi. O palaka na kumokokak sa takipsilim bago mahuli nung bio student.

Ayoko ng halik, please lang.

Gusto lang kita iyakan. Hindi naman nakakamantsa ang mga luhang ito. Huwag mo lang ako pagkwentuhin. Kung hindi, susulatan kita mula ulo hanggang paa, sisimulan ko sa palad o utong o mata. At kung maubusan ng tinta, tatalsikan kita ng laway. Ano, trip?

Pwede bang umiyak ng walang kwento? Luha lamang, sana. At balikat.

Kung hindi, okay lang, babalikan ko ang pagnguya, mag-isa, sa kaluluwang lulunukin rin Niya.

Peb 14, 2005

Nang nadapa ka

Nang nadapa ka, binulol ako
ng pangalan mo at kalabog.
Nabura ang mukha mo sa likod
ng mababang tabing ng sementong
kahon at ugat ng piping narra.

Pasaiyo ang takbo, pasigaw,
hinanap-hanap ang iyong ulo.
Tuluyang natuyuan ng laway
nang makitang bugbog ang mata mo,
gasgas ang ilong at pisngi, pingas

ang labi. Agad kitang pinilit
itindig sa binti at palangit
ituwid ang ahas mong gulugod.
Kaso, hinatak ako ng pula
sa iyong ngiti, ngipin, at gilagid.

Matigas mong binulong ang pasya:
"Trip ko ang pwesto rito." Humimlay
ako katabi mo. Walang galamay,
tinenga ko ang sahig. Tahimik
ang daigdig sa paa ng narra.

Peb 1, 2005

Zero nine two zero five three four five two three four no more

If you have my cellphone number somewhere in some phonebook, back of an unused theater ticket, dried flower, or any sort of memory, kindly accept my gratitude for keeping a digital shadow of me and this instruction to delete me. Phone's gone. Wrote a story all weekend. Rode the bus Sunday afternoon. Slept till a couple of stops before home. Found out I didn't have it when I poured out the contents of my bag.

I slept well on the bus though, that should be worth noting. And I still did, Monday morning, on the way back.