Ipinapakita ang mga post na may etiketa na salinangan. Ipakita ang lahat ng mga post
Ipinapakita ang mga post na may etiketa na salinangan. Ipakita ang lahat ng mga post

Peb 6, 2022

Lipos Ako ng Pag-ibig

ni Anna Świrszczyńska
aking salin


Lipos ako ng pag-ibig
parang dambuhalang puno at hangin,
parang espongha at dagat,
parang dakilang buhay at pagdurusa,
parang panahon at kamatayan.

Ene 27, 2022

Ibang Bahay

ni Golan Haji
aking salin


Ang bahay
Isang takot na mukha
Sa bintana ng ibang bahay.

Ako ang aking bahay
Iniinom ang tubig ng aking hininga
At inuupuan ang aking mga panaginip.

Sinindihan ng estranghero
Ang apoy sa tulugan
Nagpainit
At umukit ng mga pangalan mula sa nakalipas
Sa mga itim na dingding

Hindi ko pa rin sila mabasa.

Okt 17, 2021

Pagkakaiba

ni Laura Gilpin
aking salin


Sa anim na binhi ng mais na aking ipinunla,
aapat ang sumibol, at sa apat na iyon,
dadalawa ang nabuhay, at sa dalawang iyon,
mas matangkad ang isa.

Okt 15, 2021

Sirang Rayos

ni Mary Ruefle
aking salin


Tumatanda ka.
Minamahal mo lahat.
Pinapatawad mo lahat.
Iniisip mo: mga dahon tayo,
Mga kinakaladkad ng gulong.
Biglang may isang maringal, batik-batik
at dilaw—ay, pagtangi!
At sa sandaling iyon
Ika’y kinaladkad pailalim.

Okt 13, 2021

Niyebe

ni Barton Smock
aking salin


aba’y kahit diyos / iiwan / itong simbahan

upang tapakan ang mga buto ng bituin

Okt 10, 2021

Pulo

ni Langston Hughes
aking salin


Daluyong ng lumbay,
Huwag na akong lunurin:

Ang pulo’y natatanaw
At tila parating pa rin.

Ang pulo’y natatanaw
At kay rilag ng buhangin.

Daluyong ng lumbay,
Ako’y doon dalhin.

Okt 7, 2021

Kay ____________

ni W.S. Merwin
aking salin


Wala nang dahilan
para magbilang pa
kung gaano nang katagal
noong narito ka
at buhay isang umaga

na tila aking
pinawawalan ang pisi
ng saranggola kada araw
unti-unti sa aking daliri
habang wala namang pisi

Set 26, 2021

Unang Boto

ni Kamilah Aisha Moon
aking salin


Kaniya iyon.
Kaniya ang pagpili
sa likod ng tinabingang ligaya,
ang buong dibdib ng Dad sa kabila
habang manipis niyang kamay
ang humila sa pingga.

Wala na ito sa luwang
ng huling palugit.
Itong nag-iisang balota
ay walang kasimbigat.

Set 18, 2021

Panalanging Makamit ang Pagtitiis sa Karamdaman

ni D. Nurkse
aking salin


Hinintay kita bilang bata,
kinakabisa ang mga gasgas ng singsing
sa bubog na hawakan ng pinto
hanggang wala na akong inaasahan,
sa lalim ng gabi
at hindi ko na inaasahang ako pa rin ito
sakaling bumukas ang pinto.
     Ngayon ka narito
sa kabilang dulo ng aking buhay
at ikaw ang katahimikan ng silid,
ang liwanag na humahagod sa mga dingding,
ang mismong lagnat,
hindi na lamang ang aking ama.

Set 17, 2021

Mga Pakwan

ni Charles Simic
aking salin


Luntiang mga Buddha
Sa prutasan.
Kinakain natin ang ngiti,
Dinudura ang mga ipin.

Abr 30, 2021

Ang Tula

ni George Oppen
aking salin


Isang panulaan ng kahulugan ng mga salita
At ang bigkis sa sansinukob

Sa palagay ko’y walang liwanag sa daigdig
Bukod sa daigdig

At sa palagay ko’y may liwanag

Bintanang Walang Hanggan

ni Yehuda Amichai
aking salin


Sa hardin minsan kong narinig
ang isang awit o sinaunang basbas.

At sa ibabaw ng madidilim na puno
may bintanang laging may ilaw, sa alaala

ng mukhang dumungaw mula rito,
at ayon din itong mukha

sa alaala ng ibang
bintanang may ilaw.

Abr 4, 2021

SA ILALIM NG MGA BITUIN

ni Pierre Reverdy
aking salin sa salin ni Ron Padgett

 

Siguro nawala ko ang susi, at pinagtatawanan ako ng lahat, at bawat isa’y pinakita sa akin ang dambuhalang susing nakasabit sa kaniyang leeg.

Ako lamang ang walang paraang pumasok sa kung saan. Nawala na silang lahat at pinalulungkot lalo ang kalsada ng mga pinid na pinto. Wala ni isa. Kakatok ako sa bawat pinto.

Tumilapon ang mga insulto mula sa mga bintana at umatras ako.

Hindi nalalayo sa labas ng bayan, sa gilid ng ilog at mga puno, natagpuan ko ang isang pinto. Isang tarangkahang payak at walang kandado. Pumunta ako sa likod nito at, sa isang gabi na walang bintana ngunit makakapal ang kurtina, sa pagitan ng gubat at ng ilog na nagtanggol sa akin, nagawa kong makatulog.

Abr 2, 2021

Ang Pagtutuos

ni Jane Hirshfield
aking salin



Ang mga kadahilanan ng puso,
kung malinaw na mapagmamasdan,
dinadala
maging ng pinakamatigas
ang mga bakas ng latigo at lungkot
at kailangang patawarin,

tulad ng pagpapatawad
ng elandong ginutom ng hulaw
sa leon na ginutom ng hulaw,
na kinuha siya sa wakas,
at kusa siyang pumasok
sa buhay na hindi matanggihan,
na leon, na napakain,
at hindi na nakaaalala sa kaniya.

Kakaunti ang mga butil ng ligaya
na itinatapat sa kalakhan ng dilim
ngunit balanse pa rin ang timbangan.

Hinihingi lamang ng daigdig
ang taglay nating lakas at ibinibigay natin.
At humihingi pa ito, at ibinibigay natin.

Mar 29, 2021

Hindi nasabi

aking salin
ni Dana Gioia


Kay laki sa ating pagkabuhay ang nagaganap sa loob—
Ang mga talaarawan ng dalamhati, ang buhol na dila ng kirot
Ng mga di-inaaming pag-ibig ay hindi nabawasan ng katotohanan
Kahit lumipas nang hindi nasabi. Ang ating ikinukubli
Ay laging higit sa lakas-loob nating naipagtatapat.
Isipin ang mga liham na sinusulat natin para sa ating yumao.

Mar 25, 2021

Ars Poetica

ni Aracelis Girmay
aking salin


Nawa’y ang mga tula’y
maging bakas ng munting kuhol.

Saan man ako magpunta,
kada pulgada: tahimik na talaan

ng pilak na dasal ng paa:
            Minsan akong nabuhay.
            Salamat.
            Dito naganap.

Mar 19, 2021

aral ng mga nahuhulog na dahon

ni Lucille Clifton
aking salin


naniniwala ang mga dahon
ang ganitong pagbitaw ay pag-ibig
ang ganitong pag-ibig ay pananalig
ang ganitong pananalig ay pagpapala
ang ganitong pagpapala ay diyos
sang-ayon ako sa mga dahon

Mar 18, 2021

Panuntunan

ni Linda Pastan
aking salin


Kailangang iugoy sa iyong mga braso ang sakit
hanggang makatulog ito, at iwan

sa pinadilim na silid
at tumiyad paalis.

Isang saglit mong mararamdaman
ang kahungkagan ng kapayapaan.

Ngunit sa kabilang silid
nagsisimula nang kumilos ang sakit.

Sandali na lamang
at uusalin nito ang iyong pangalan.

Mar 12, 2021

Saksi

ni W.S. Merwin
aking salin


Nais kong sabihin
kung ano ang mga gubat

Kailangan kong magsalita
sa nakalimutang wika

Mar 7, 2021

Buwan sa Bintana

ni Dorianne Laux
aking salin



Sana puwede kong sabihing ako ang tipo ng bata
na tutunghayan ang buwan mula sa kaniyang bintana,
susundan ito, at magtataka.
Hindi ako nagtataka. Nagbabasa ako. Madidilim na senyas
na nangangagsigapangan tungo sa bingit ng pahina.
Nakailang taon din ako bago tubuan ng puso
mula sa papel at pandikit. Lahat na sa akin
ang lente, kasingliwanag ng buwan,
isang butas na nagliliyab sa ilalim ng kumot.